Сириянын убактылуу президенти Вашингтонго барат

Сириянын өткөөл мезгилдеги президенти Ахмед аш-Шараа жекшемби күнү АКШнын президенти Дональд Трамптын чакыруусу менен Вашингтонго барууну пландап жатат. Бул тууралуу Syria TV телеканалы өз булагына таянып жазып чыкты.

Маалыматка ылайык, жолугушууда Сирияга экономикалык колдоо көрсөтүү, өлкөгө карата калган санкцияларды алып салуу, эки тараптуу кызматташтыкты кеңейтүү, ошондой эле Сириядагы жана Жакынкы Чыгыштагы саясий-аскердик кырдаал талкууланат. Өзгөчө көңүл Түштүк Ливандагы абалга бурулары күтүлүүдө.

Буга чейин Ахмед аш-Шараа Дональд Трамп менен телефон аркылуу сүйлөшүп, Сирияны калыбына келтирүү жана реконструкциялоо мезгилинде эл аралык колдоону улантуунун маанилүүлүгүн белгилеген.

Ал ошондой эле өлкөнүн экономикасын жандандыруу жана жарандардын жашоо шарттарын жакшыртуу үчүн калган санкцияларды алып салуу зарыл экенин билдирген.