Apple’дын жаңы башчысы дизайнерлердин таасирин кайра күчөтүүнү көздөйт

Apple компаниясынын келечектеги башкы директору Жон Тернус компаниядагы өнөр жай дизайны боюнча команданын ролун күчөтүп, аны кайрадан негизги чечим кабыл алуучу борборлордун бирине айлантууну пландап жатат.

Маалыматтарга караганда, Стив Жобс жана Жонни Айв иштеген мезгилде дизайнерлер жаңы өнүмдөрдүн концепциясын, форматын жана колдонуучу тажрыйбасын аныктоодо чоң таасирге ээ болушкан.

Бирок Жонни Айв компаниядан кеткенден кийин дизайн бөлүмүнүн салмагы азайып, негизги чечимдер көбүрөөк операциялык жана каржылык бөлүмдөр тарабынан кабыл алына баштаган. Адистердин пикиринде, акыркы жылдары Apple түзмөктөрүнүн дизайнында чоң өзгөрүүлөрдүн сейрек болушу да ушул жагдай менен байланыштуу.

Жон Тернус 2026-жылдын сентябрында кызматка киришкенден кийин дизайн багыты боюнча жаңы жетекчи дайындап, ага кеңири ыйгарым укуктарды берүүнү көздөп жатат. Жаңы жетекчи компаниянын стратегиялык чечимдерине түздөн-түз катышып, инновациялык өнүмдөрдү жаратууга жооптуу болот.

Эске салсак, апрель айында Тим Кук башкы директорлук кызматтан кетери белгилүү болуп, анын ордуна 1-сентябрдан тарта Жон Тернус дайындалары жарыяланган. Ал эми Apple компаниясында дизайнерлердин ролун күчөтүү келечектеги жаңы технологиялык чечимдерге жол ачары күтүлүүдө.