Өзбекстан өспүрүмдөр үчүн соцтармактарга чектөө киргизиши мүмкүн

Өзбекстан 16 жашка чейинки балдардын социалдык тармактарды колдонушуна чектөө киргизиши мүмкүн. Учурда тиешелүү мыйзам долбоорун иштеп чыгуу маселеси талкууланууда. Бул тууралуу "Газети.uz" басылмасы жазды.

Өлкөнүн билим берүү министри Эъзозхон Каримованын айтымында, бул маселе учурда активдүү каралууда. Мыйзам долбоорун иштеп чыгып, аны коомдук талкууга чыгаруу пландалууда.

«Биз дагы азыр бул маселени карап жатабыз. Бул тууралуу депутаттарыбыз жана сенаторлорубуз менен сүйлөштүк. Мыйзам долбоорун иштеп чыгып, коомдук талкууга чыгарууну каалап жатабыз. Менимче, мындай тартип бизде да болушу керек», — деген министр.

Ал балдарды телефондон толугу менен ажыратуу мүмкүн эмес экенин белгилеп, эң башкысы аларды туура пайдалануу маданиятын жана эрежелерин калыптандыруу зарыл экенин белгиледи.

Эске салсак, өспүрүмдөр үчүн соцтармакты чектөө буга чейин Австралия, Индонезия жана Бразилия өлкөлөрүндө кабыл алынган. Ал эми Испания, Франция жана Улуу Британия, Түркия сыяктуу өлкөлөрдө азыркы учурда каралып жатат.