Бишкекте бир күндө 720 миңден ашуун жүргүнчү накталай эмес төлөм жүргүзгөн

Бишкек шаарынын мэри Айбек Жунушалиев жол кирени накталай эмес төлөө тутумуна өтүүгө байланыштуу коомдук транспорттун айдоочулары менен жолукту. Бул тууралуу мэриянын басма сөз кызматы билдирди.

"Ушул жылдын апрель айынан тартып айдоочулардын эмгек акысы 33 пайызга жогорулатылды. Эми биздин жалпы милдетибиз - жаңы окуу жылы башталганга чейин жол кирени накталай эмес төлөө системин толук ишке киргизүү. Кечээ эле 720 миңден ашуун жүргүнчү жол киресин накталай эмес ыкма менен төлөдү",- деп белгиледи мэр.

Белгилей кетсек, 1-июлдан тартып Бишкек шаарында жүргүнчүлөр жол кирени "Тулпар" транспорттук картасы, Visa, Mastercard жана "Элкарт" банктык карталары жана башка электрондук төлөм сервистери аркылуу гана төлөй алышат.