Бишкекте жолдор жабылат: тургундарга убактылуу шаардан чыгып туруу сунушталды

Президенттин басма сөз катчысы Аскат Алагөзов 30–31-август жана 1-сентябрь күндөрү Бишкек шаарында өтө турган эл аралык иш-чараларга байланыштуу борбор калаанын тургундарына кайрылуу жасады.

Анын айтымында, бул күндөрү Бишкекте Шанхай Кызматташтык Уюмунун саммити жана Дүйнөлүк көчмөндөр оюндарынын ачылыш аземи өтөт. Өлкөгө 21 мамлекеттин жетекчилери, алардын айрымдары биринчи айымдары менен келишет. Ошондой эле бир катар президенттердин Кыргызстанга мамлекеттик сапарлары да пландалган.

Ушуга байланыштуу борбор калаада коопсуздук чаралары күчөтүлүп, жолдор убактылуу жана тез-тез жабылып турушу мүмкүн.

Аскат Алагөзов Бишкек шаарынын тургундарын мүмкүн болсо бул күндөрү Ысык-Көлгө же башка эс алуучу жайларга барып турууга чакырып, шаар ичинде жүрүүдө ыңгайсыздыктар жараларын эскертти.

Ошондой эле ал мектептер менен жогорку окуу жайларында окуу 15-сентябрдан башталарын белгилеп, 1-сентябрга карата Бишкекке шашылыш келүүнүн зарылдыгы жок экенин айтты.