Кытайда бут кийим фабрикасындагы өрттөн 28 адам каза болду

Кытайдын Цзиньцзян уездиндеги "Huiteng Shoes" компаниясына таандык бут кийим фабрикасында өрт чыкты. Анын кесепетинен 28 адам каза болгонун "Синьхуа" агенттиги билдирди.

Маалыматка ылайык, өрт чыккан учурда имаратта 237 жумушчу жана жеткирүү кызматынан эки кызматкер болгон. Жалпысынан 213 адам эвакуацияланып, алардын экөө ооруканада каза тапкан. Мындан тышкары, дайынсыз жоголгон деп эсептелген 26 адамдын каза болгону тастыкталды.

Куткаруу иштерине 500дөн ашуун өрт өчүрүүчү тартылган. Фуцзянь провинциясынын бийлиги кырсыктын кесепеттерин жоюу, анын себептерин аныктоо жана күнөөлүүлөрдү табуу үчүн атайын штаб түздү.

Полиция шалаакылыкка шектелип компаниянын ээсин жана дагы бир нече кызмат адамын кармады. Компаниянын эсептери тоңдурулду, териштирүү иштери уланууда.