Израил АКШнын Иранга каршы соккуларына кошулууга даяр экенин билдирди

Израилдик ЖМКлардын маалыматына караганда, эгер АКШ жардам сураса, Израил Иранга каршы аскердик соккуларга кайрадан кошулууга даяр.

Израилдик булактын айтымында, өлкө буга чейин АКШны колдой турганын далилдеген жана зарыл болсо, мындай кадамды дагы кайталоого даяр.

Эске салсак, июнь айынын ортосунда Тегеран менен Вашингтон аскердик жаңжалды токтотууну караган меморандумга кол коюшкан.

Бирок 8-июлга караган түнү АКШ Иранга каршы соккуларды кайра жандандырды. Президент Дональд Трамп муну Ирандын Ормуз кысыгындагы коммерциялык кемелерге каршы аракеттерине жооп катары түшүндүрүп, мындай окуялар кайталанса чабуулдар күчөтүлөрүн эскерткен.

Өз кезегинде Иран АКШнын Жакынкы Чыгыштагы аскердик объекттерине сокку уруп жатканын билдирүүдө. Өлкөнүн Тышкы иштер министрлиги Вашингтондун аракеттерин жетишилген келишимдерди одоно бузуу катары баалады.