Астанада 14 жаштагы мектеп окуучусунун иши боюнча сот өкүмү коомчулукта нааразылык жаратты

8-июлда Казакстандын Астана шаарында 14 жаштагы мектеп окуучусуна карата сексуалдык зомбулук иши боюнча сот өкүмү чыгып, ал коомчулукта кызуу талкуу жаратты. Бул тууралуу жергиликтүү басылмалар жазып чыгышты.

Соттун чечими менен 3 колледж студенти 8 жылдан 13 жылга чейин эркинен ажыратылды. Дагы бир айыпталуучу кылмыш тууралуу билдирбегени үчүн 2 жыл 8 айга соттолду.

Укук коргоочулар менен коомдук активисттер соттун чечимин сынга алып, иш боюнча айыптоо сотко чейин жеңилирээк берене боюнча өзгөртүлгөнүн жана жабырлануучунун ата-энеси бул тууралуу алдын ала кабардар болбогонун билдиришти. Жабырлануучунун жактоочулары өкүмгө каршы апелляциялык даттануу берип, ишти Жогорку сотко жана эл аралык укук коргоо уюмдарына чейин жеткирүүнү көздөп жатышканын маалымдашты.