Европа чемпиону Владислав Карпачев менен апасынын өлүмү боюнча жаңы маалымат айтылды

Бүгүн, 14-июлда Орусиянын маалымат агенттиктери украиналык мушкер, Европа чемпиону Владислав Карпачев жана анын апасынын өлүмү боюнча жаңы маалыматтарды таратышты.

Маалыматка ылайык, спортчунун атасы Игорь Карпачев уулу менен жубайын Донецк облусунун Гришино айылындагы үйдөн ок тийип каза болгон абалда тапкан.

"Жубайым кире бериш жерде атып өлтүрүлгөн бойдон жатты. Андан кийин үйдүн жер төлөсүнө түшсөм, уулумдун сөөгү ошол жерде экен",- деген ал.

Атасы уулу Дүйнө чемпиондугуна активдүү даярданып жатканын жана бул кайгылуу окуя тууралуу кошунасынан укканын айткан.

Окуя болгон жерге келгенде Карпачев кандын издерин жана атылган итти көргөн. Анын айтымында, жубайына 7 автомат огу тийген, ал эми уулуна 5 ок атылган. Ошондой эле мушкер өлөр алдында катуу кыйноого алынганы айтылды.

Игорь Карпачев окуяга Украинанын Куралдуу күчтөрүнүн аскерлеринин тиешеси бар экенин, үйдөн Toyota үлгүсүндөгү унаа, 8 миң доллар жана башка акча каражаттары алынганын кошумчалаган.

Эске салсак, каргашалуу окуя 2025-жылы 26-июнда Донецк облусунун Гришино айылында болгон.