Месси Ямаль менен түшкөн сүрөтү тууралуу айтып берди

Аргентинанын курама командасынын чабуулчусу Лионель Месси кичинекей Ламин Ямалды жуунтуп жаткан сүрөт тууралуу алгачкы жолу комментарий берди.

Анын айтымында, жылдар өткөндөн кийин сүрөттөгү бала менен футбол боюнча Дүйнө чемпиондугунун финалында жолуга турганын элестете да алган эмес.

"Бир кезде кокусунан бир ымыркай менен сүрөткө түшүп калып, эми аны менен Дүйнө чемпиондугунун финалында беттешем деп ким ойлоптур? Бул чындыгында эле таң калычтуу!" - деген Месси.

Сүрөт 2007-жылы испаниялык гезиттердин биринин кайрымдуулук календары үчүн тартылган. Анда 20 жаштагы «Барселонада» ойноп жүргөн Месси Каталониядагы ымыркайлар менен фотосессияга катышкан. Ошол наристелердин бири кийинчерээк атактуу футболчуга айланган Ламин Ямаль болгон.

Көп жылдар бою бул сүрөт коомчулукка дээрлик белгисиз бойдон келген. Бирок 2024-жылдын жай айларында Ямалдын атасы аны социалдык тармактарга жарыялаган.

Бүгүн, 19-июлда Месси менен Ямаль футбол боюнча Дүйнө чемпиондугунун финалында Испания менен Аргентинанын курамында бири-бирине каршы оюнга чыгышат.