Япония эми чочконун бөйрөгүн адамга салабы?

Японияда адамга жаныбардан орган көчүрүү боюнча алгачкы клиникалык сыноолорго даярдык башталды.

Чет өлкөлүк басылмалардын маалыматына ылайык, PorMedTec биотехнологиялык стартапы генетикалык жактан өзгөртүлгөн чочколорду өстүрүп жатат. Алардын бөйрөгүн адамга көчүрүү боюнча сыноолор 2028-жылы башталышы мүмкүн.

Компаниянын планы боюнча, 2030-жылы жаныбарлардан адамга орган көчүрүүгө шарттуу уруксат алуу, ал эми 2033-жылга чейин бул ыкманы кадимки дарылоо ыкмасына айлантуу көздөлүүдө.

Генетикалык өзгөртүүлөр адамдын организми жаңы органды четке какпашы үчүн жасалган. Алгачкы бейтаптар бөйрөк жетишсиздигинен жабыркап, диализ алып жаткан 60 жаш чамасындагы адамдар болот деп күтүлүүдө.

Буга чейин 2022-жылы АКШда биринчи жолу генетикалык өзгөртүлгөн чочконун жүрөгү адамга көчүрүлгөн. Бирок бейтап операциядан 2 айдан соң каза болгон.