Кыргызстан менен Индия соода жана инвестициялык кызматташууну кеңейтүүнү талкуулашты

23-июлда Чолпон-Ата шаарында өтүп жаткан ШКУга мүчө мамлекеттердин Тышкы иштер министрлер кеңешинин жыйынынын алкагында Кыргызстандын тышкы иштер министри Жээнбек Кулубаев Индиянын тышкы иштер, айлана-чөйрө, токой чарбасы жана климаттын өзгөрүшү боюнча мамлекеттик министри Кирти Вардхан Сингх менен эки тараптуу жолугушуу өткөрдү.

ТИМден билдиришкендей, жолугушууда тараптар эки өлкөнүн ортосундагы соода жүгүртүүнү көбөйтүү, инвестицияларды тартуу, өндүрүш тармагындагы кызматташтыкты өнүктүрүү жана туристтик алмашууларды кеңейтүү маселелерин талкуулашты. Ошондой эле банктар аралык кызматташтыкты күчөтүүгө өзгөчө көңүл бурулду.

Мындан тышкары, министрлер Шанхай кызматташтык уюму алкагындагы кызматташтыктын келечеги боюнча пикир алышып, жогорку жана эң жогорку деңгээлдеги алдыдагы жолугушуулардын графигин карап чыгышты.

Жолугушуунун соңунда Кыргызстан менен Индия өз ара пайдалуу кызматташууну мындан ары да тереңдетүүгө даяр экенин ырасташты.