АКШ Казакстан, Түркия, Орусия, Кытай сыяктуу 60 өлкөгө жаңы тарифтерди киргизди

АКШ 60 өлкөдөн импорттолгон товарларга жаңы тарифтерди киргизди. Тарифтер 10 пайыз жана 12,5 пайыз өлчөмүндө белгиленген. АКШнын Соода министрлиги жаңы тарифтер импорттун 99,4 пайызына таасир этерин билдирди.

Чет элдик басылмалар жазышкандай, 10 пайыз тариф Аргентина, Бангладеш, Улуу Британия, Камбоджа, Канада, Эквадор, Сальвадор, Гватемала, Гондурас, Индия, Индонезия, Иордания, Малайзия, Мексика, Пакистан, Шри-Ланка жана Тринидад жана Тобагодон келген товарларга тиешелүү.

Европа биримдигинин өлкөлөрүнө, Тайванга, Японияга, Түштүк Кореяга жана Швейцарияга учурдагы тарифтер менен айкалышканда жалпысынан 10 пайыз же 12,5 пайыз түзгөн тарифтер коюлган. Калган 38 өлкөгө 12,5 пайыз ставка коюлган. Аларга Казакстан, Түркия, Орусия, Вьетнам жана Кытай кирет.

Мунай жана газ, жер семирткичтер, айрым азык-түлүк товарлары жана улуттук коопсуздук максатында атайын тарифтерге дуушар болгон товарлар, анын ичинде унаалар, болот, алюминий жана жез, тарифтерден бошотулган. АКШ-Канада-Мексика соода келишиминин шарттарына жооп берген товарлар үчүн да жеңилдиктер каралган.