Ливан Иракка мунай ташуунун жаңы жолун сунуштады

Бүгүн, 28-июлда Ливан Иракка мунайды Жер Ортолук деңизине жеткирүү үчүн өз аймагы аркылуу өтүүчү альтернативдүү маршрутту сунуштаганы белгилүү болду. Бул тууралуу чет өлкөлүк маалымат булактары жазышты.

Сунуш Ливандын премьер-министри Наваф Саламдын Багдадга болгон сапары учурундагы сүйлөшүүлөрдө айтылган.
Маалыматка караганда, ОПЕКтеги мунай өндүрүү боюнча экинчи ири өлкө болгон Ирак Ормуз кысыгынын жабылышынан олуттуу жабыркаган. Өлкөнүн чийки мунай экспорту суткасына 4,2 миллион баррелден 1,5 миллион баррелге чейин төмөндөгөн.

Ушуга байланыштуу Ирак мунай экспортун коопсуз багыттар аркылуу жүргүзүүнүн альтернативдүү жолдорун издеп жатат. Ливан өз аймагын Жер Ортолук деңизине чыгуучу кошумча маршрут катары пайдаланууну сунуштады.

Долбоор Киркук-Банияс тарыхый мунай куурун калыбына келтирип, кеңейтүүнү карайт. Мунай кууру Сириянын аймагы аркылуу өтүп, Ливандын Триполи портуна чейин жетет.

Ливандын энергетика министри Жо Садди сүйлөшүүлөрдү "позитивдүү" деп баалап, долбоорду изилдөө үчүн эки өлкөнүн биргелешкен жумушчу тобу түзүлгөнүн билдирди.