Баш ооруну басаңдаткан балмуздак тууралуу уктуңуз беле?

Элестетип көрүңүз: башыңыз ооруп жатат, бирок дары ичпей эле балмуздак жеп айыгып калдыңыз. Кызык угулуп жатабы? Бир караганда бул тамаша сыяктуу сезилет. Бирок Нидерландда бир кондитер дал ушундай "дарысы бар балмуздак" жасап көргөн.

2016-жылы нидерланддык кондитер Ян Нагелкерке карнавал үчүн адаттан тыш балмуздак жасап, 6 литр ванилдүү балмуздакка болжол менен 20 даана парацетамол таблеткасын кошкон.

Бирок бул балмуздак сатуу үчүн эмес, карнавалдагы тамаша иретиндеги экспонат катары гана даярдалган. Кийин анын сүрөтү социалдык тармактарда кайрадан тарап, айрымдар Нидерландда баш ооруну басаңдаткан балмуздак сатылат деп жаңылыш маалымат тарата баштаган.

Кондитердин өзү балмуздак тамак катары колдонууга арналбаганын айтып, иш-чарадан кийин калган бөлүгү толугу менен жок кылынганын билдирген.

Адистердин айтымында, дары-дармектерди тамак-ашка аралаштыруу кооптуу. Мындай учурда адам кабыл алган дарынын өлчөмүн так көзөмөлдөй албай, кокусунан ашыкча дозада колдонуп алуу коркунучу жаралат. Ошондуктан парацетамол кошулган мындай балмуздак соодага чыгарылган эмес.

Ал эми сиз, эгер мындай балмуздак чындап сатылса, жеп көрөт белеңиз?