Wildberries'тин кампаларына чабуул уланууда (видео)

30-июлга караган түнү Орусиянын Пенза облусунда жайгашкан Wildberries компаниясынын кампасына украиналык дрондор чабуул жасашты. Бул тууралуу орусиялык басылмалар жазышууда.

Облустун губернатору Олег Мельниченконун айтымында, окуядан бир адам жаракат алып, болжол менен 200 кызматкер коопсуз жайга эвакуацияланган. Чабуулдан кийин кампанын аймагында өрт чыккан.

Wildberries & Russ компаниясы кызматкерлер толугу менен эвакуацияланганын жана жабыркаган адамга медициналык жардам көрсөтүлгөнүн билдирди. Ошондой эле товарларды кабыл алуу жана кардарлардын буюртмаларын жөнөтүү убактылуу башка логистикалык борборлор аркылуу жүргүзүлүп жатканын маалымдады.

Айта кетсек, 18-июлдан бери Украина Wildberries компаниясынын Орусиядагы логистикалык борборлоруна ракета жана дрондор менен сокку урууда. Буга байланыштуу компания Казакстандан кампаларды ижарага алууну пландап жатканы айтылууда.