Марлен Маматалиев Кыргызстандын жана Өзбекстандын жаш парламентарийлеринин II форумуна катышты

Бүгүн, 10-августта Жогорку Кеңештин төрагасы Марлен Маматалиев Кыргызстандын жана Өзбекстандын жаш парламентарийлеринин II форумуна катышты. Бул тууралуу Жогорку Кеңештин басма сөз кызматынан билдиришти.

“Жаштар – жалпы прогресске жана тынчтыкка карай жолдо” деген ураандын алдында өткөн форумга эки өлкөнүн депутаттары, жаш парламентарийлер, эксперттер жана коомдук уюмдардын өкүлдөрү катышты.

Марлен Маматалиев форумдун маанилүүлүгүнө токтолуп, кыргыз-өзбек элдеринин тарыхый, маданий жана руханий жакындыгын белгиледи. Анын айтымында, акыркы жылдары эки өлкөнүн жетекчилеринин саясий эркинин негизинде кыргыз-өзбек мамилелери жаңы деңгээлге көтөрүлдү.

Төрага парламенттер аралык байланыштар да активдүү өнүгүп жатканын белгилеп, бул жетишкендиктерди жаш муунга өткөрүп берүү жана достукту биргелешкен долбоорлор аркылуу бекемдөө зарылдыгын айтты.

Ошондой эле ал жаш парламентарийлердин кызматташуусун бир жолку иш-чаралар менен чектебестен, туруктуу негизде улантуу маанилүү экенин белгиледи.

Форумдун жүрүшүндө жаштардын коомдук-саясий процесстердеги ролун жогорулатуу, эки өлкөнүн жаш парламентарийлеринин кызматташуусун кеңейтүү жана биргелешкен демилгелерди колдоо маселелери талкууланды.

Жыйынтыгында тараптар жаш парламентарийлердин ортосунда туруктуу диалогду улантуунун жана тажрыйба алмашуунун маанилүүлүгүн белгилешти.