Көчмөндөр оюндарынын маданий программасы талкууланды

Бишкекте VI Дүйнөлүк көчмөндөр оюндарынын маданий программасы талкууланды. Жолугушууга маданият өкүлдөрү, тарыхчылар, этнографтар жана чыгармачыл инсандар катышты. Бул тууралуу Маданият министрлиги билдирди.

Министр Мирбек Мамбеталиев VI Дүйнөлүк көчмөндөр оюндары 31-августтан 6-сентябрга чейин өтүп, анын алкагында "Бишкек Аренада", "Курманжан Датка" этнографиялык музейинде, Чолпон-Атадагы ат майданда, "Рух Ордо" маданий борборунда, "Дордой Номад" комплексинде жана Кырчын жайлоосунда кеңири маданий программа уюштуруларын белгиледи.

"Өзгөчө көңүл Кырчындагы "Көчмөндөр ааламы" этно-маданий шаарчасына бурулат. Анда улуттук музыка, манасчылык, төкмө акындык өнөр, кол өнөрчүлүк, улуттук тамак-аш жана каада-салттар көрсөтүлөт. Маданий программанын негизги максаты - улуттук мурасты сактоо жана кийинки муунга өткөрүп берүү",- деп кошумчаланды маалыматта.