Жанар Акаев Сулайман-Тоону ЮНЕСКОнун тизмесинен чыгаруу маселесин көтөрдү (видео)

Сулайман-Тоону ЮНЕСКОнун Дүйнөлүк мурастар тизмесинен чыгаруу сунушталды. Бул тууралуу Ош шаарынын мэри Жанар Акаев журналист Семетей Аманбеков менен болгон маегинде билдирди.

Мэрдин айтымында, ЮНЕСКОнун талаптары аймакты өнүктүрүүгө, анын ичинде тоону айланып өтүүчү жол курууга байланыштуу айрым чектөөлөрдү жаратууда. Аталган жол туристтер үчүн ыңгайлуу шарт түзүү максатында пландалып жатканы айтылды.

Калаа башчысы бул демилгени азырынча ооз эки билдиргенин кошумчалады.

Эскерте кетсек, Сулайман-Тоо 2009-жылы ЮНЕСКОнун Дүйнөлүк мурастар тизмесине киргизилген. Ошондон бери анын табигый көрүнүшү жана тарыхый-маданий аймагы өзгөчө коргоодо турат.