Adidas кроссовкаларды лоферлерге айлантып, жаңы трендди баштады

Adidas популярдуу Handball Spezial моделинин жаңы версиясын сунуштады. Бул жолу спорттук бут кийим классикалык лофердин дизайны менен айкалыштырылды.

Handball Spezial Loafer акыркы жылдардагы бир нече мода тенденциясын бириктирет. Анда ретро силуэт, минималисттик дизайн жана спорттук стилди классика менен айкалыштыруу өзгөчөлүгү бар.

Жаңы моделде буга чейин таанымал болгон Spezialдин формасы сакталган. Бирок замша материалынын ордуна жылмакай кара булгаары колдонулган. Алдыңкы бөлүгүнө лоферлерге мүнөздүү жээк жана булгаарыдан жасалган кайыш кошулган. Ал эми Adidas'тын үч ак сызыгы менен жапыз резина таманы өзгөрүүсүз калган.

Кара түстөгү классикалык версиядан тышкары, леопард өңдүү жана Бэмбиге окшош тактуу, үлпүлдөк варианттары да бар.

Моделдин популярдуулугуна Handball Spezial сериясынын буга чейинки ийгилиги да таасир этүүдө. Акыркы жылдары бул бут кийимди Эндрю Гарфилд, Пол Мескал жана Харрис Дикинсон сыяктуу белгилүү адамдардан көрүүгө болот.

Кроссовкаларды классикалык бут кийимге айландыруу тенденциясы Adidas менен гана чектелбейт. GQ басылмасынын маалыматына караганда, Vans өзүнчө лоферлер линиясын өнүктүрүп жатса, Converse Chuck Taylor жана One Star моделдерин лофер стилине ылайыкташтырууда.

Adidasтын расмий сайтында кара түстөгү Handball Spezial Loafer модели 130 долларга сатылууда.

Мода адистеринин баамында, спорттук жана классикалык стилдин ортосундагы мындай айкалыш жакынкы мезгилдеги негизги бут кийим тренддеринин бири болушу мүмкүн.