"Башынан сылабайбыз". Садыр Жапаров парламентте кыргызстандыктарга кайрылды

Бүгүн, 9-сентябрда өлкө башчы Садыр Жапаров Жогорку Кеңештин трибунасында кыргызстандыктарга кайрылуу жасады.

Президент Кыргызстан өз тарыхында туруксуздукту, саясий тирешүүлөрдүн азабын, коомдук бөлүнүүлөрдүн кесепетин өткөргөнүн эске салып, андан сабак алуу керектигин айтты. Мамлекет башчысы коомдо ар кандай темада курч талкуулар сөзсүз болорун, бирок аны тирешүүгө, бөлүнүүгө бурган тараптарга кечирим болбошу керектигин белгиледи. Президенттин айтымында, талкуу жүрүп жаткан маселелерде саясий упай топтоо үчүн элдин ортосуна бүлүк салгандар бар.

"Демократия деген атка жамынып алып, жоопкерчиликтен мурун ээн оздукка баргандын өзү жапайычылык. Жалган маалымат таратып, тынч жаткан элдин башын айландырып, өнүгүүгө терс таасир эткендердин башынан сылабайбыз",- деди Садыр Жапаров.