Алымбек Осмонов Чүй районунун акими болуп дайындалды

Чүй районунун акими болуп Алымбек Осмонов дайындалды. Бул тууралуу райондук администрациядан бүгүн, 15-сентябрда билдирди.

Осмонов 1971-жылдын 3-мартында Жалал-Абад облусунун Базар-Коргон районунун Акман айылында туулган. К.И. Скрябин атындагы Кыргыз айыл чарба институтун жана Кыргыз экономикалык академиясын, ошондой эле юридикалык багытта билим алган.

Эмгек жолун 1992-жылы баштап, жер ресурстары, айыл чарба, мамлекеттик каттоо жана мамлекеттик башкаруу тармактарында жетекчилик кызматтарда эмгектенген. 2022-жылдан тартып жер ресурстары жана кадастр тармагында жетекчилик кызматтарды аркалап келген.

Мамлекеттик кызматтагы көп жылдык эмгеги үчүн бир катар мамлекеттик жана ведомстволук сыйлыктар, анын ичинде Министрлер кабинетинин, президенттин Чүй облусундагы ыйгарым укуктуу өкүлүнүн, Бишкек шаарынын мэриясынын Ардак грамоталары жана башка ведомстволук сыйлыктар менен сыйланган.