"Жеңил унааларды алып келүүдөгү салыктык нарктын эски тарифи февраль айына чейин узартылбаса, митинг токтобойт" дейт Нурбек Турсунбаев

"Чет өлкөдөн жеңил унааларды алып келүүдөгү салыктык нарктын эски тарифи февраль айына чейин узартылбаса, митинг токтобойт". Мындай пикирин бүгүн, 23-январда SUPER.KG порталына Унаа ташуучулар ассоциациясынын төрагасы Нурбек Турсунбаев билдирди.

“Салыктык нарктын жаңы тарифинин мөөнөтүн февраль айына чейин узартуу керек. Ошондо гана жүздөгөн ишкердин моюнуна илинген көйгөйлөр жарым-жартылай чечилет. Сентябрь айында өкмөт тарабынан кабыл алынган токтом бизге каршы иштөөдө. Бул биздин чөнтөккө ири суммадагы карыздарды алып келип жатат. Эгерде өкмөт кабыл алынган токтомдун мөөнөтүн узартып бербесе, биз ал токтомду такыр алып салууну талап кылып митингдерди уланта беребиз”,- дейт Н.Турсунбаев.  

Анын айтымында, азыркы тапта унаа ташыгандардын ар биринин моюнуна кем дегенде 4, эң көбү 60 унаанын салыктык наркы илинди. Эгер аны эсептей келсек, анын суммасы 24 миң доллардан 360 миң долларга чейин чыгып кетет. Ал эми мындай эсептегенде, чет жактан алынып келген баасы 5 миң долларлык унаага 6 миң салыктык нарк кошулуп, анын баасы 11 миң долларга чыгууда.