Малайзиялык журналисттер “Супара” этнокомплексинде болушуп, кыргыздын нукура өзгөчөлүгүн көрүштү

Малайзиялык журналисттер 29-июлда Бишкектин четиндеги “Супара” этнокомплексинде болушуп, кыргыздын нукура өзгөчөлүгүн көрүштү. Коноктор алгач комплекстин музейиндеги экспонаттар менен таанышып, аймактын өзгөчөлүгүнө суктанышып, улуттук кийимчен кызматкерлер менен сүрөткө түшүштү.

Иш-чарада быйыл Малайзияга барып келишкен кыргыз журналисттери Малайзиядагы сапары тууралуу айтып беришсе, коноктор Ысык-Көл облусундагы туризм тармагынын артыкчылыктары жана кемчиликтери тууралуу ойлорун айтышты.

Кечеде кыргыз журналисттеринин малайзиялык конокторго арнаган музыкалык программасы орун алып, кыргыз жана малай элинин улуттук музыкалары жаңырды. "Супаранын" атынан конокторго ырчы Гүлнара Раимжанова комузда, ооз комузда өнөрүн тартуулап, кыргыздын керемет кайрыктары оболоду. Баарынан да ырчы комуз менен малай тилинде ырдаганда коноктор абдан таң калышып, сүйүнүчтөрү коюнга батпай жыргап угушту. Соңунда меймандарга белектер тартууланды.

Эскерте кетсек, быйыл 6-июнда тажрыйба топтоо үчүн мамлекетибиздин жалпыга маалымдоо каражаттарынын өкүлдөрү жана кыргыз эстрада жылдыздары Малайзияга барышкан эле.

24-июлда Кыргыз Республикасынын Малайзиядагы элчилигинин чакыруусу менен өлкөгө “The Star”, “TV3 Malaysia”, “Bernama” аттуу 3 ири малайзиялык медиамекеменин журналисттери келишкен. Алар Ысык-Көл облусунда 5 күн болушуп, кечээ, 29-июлда Бишкекке келишти. 

Иш-чаранын максаты - Кыргыз Республикасын эл аралык аренада даңазалоо.

Бүгүн, 30-июлда кечке маал чет өлкөлүк коноктор мекенине кайтышат.