Тазабек Икрамов: "Эмнеге гейлерди колдогон адамдар жоопко тартылышпайт, ал эми мусулмандарды колдогондор жоопко тартылышы керек?"

"Эмнеге гейлерди колдогон адамдар жоопко тартылышпайт, ал эми мусулмандарды колдогондор жоопко тартылышы керек?" - деди бүгүн, 9-июнда Жогорку Кеңештин жыйынында жума күнкү түшкү тыныгууну 1 саатка узартууну демилгелеген депутат Тазабек Икрамов.

"Чубак ажы Жалилов жарандарыбызды туура жашоого үгүттөгөн адам. Ал жаштарга "Сирияга барбагыла, ата-энеңерди сыйлагыла" деп жүрөт. Жалилов өлкөбүз үчүн оор мезгилде эки элди бириктирген. Анын бейөкмөт уюмдардай эле өз пикирин айтууга акысы бар. Эмнеге ал жоопкерчиликке тартылышы керек? Эмнеге гейлерди, педофилдерди колдогон адам жоопко тартылбайт? Жума күнкү түшкү тыныгууну 1 саатка узартуу боюнча демилгем Орозо айында элди экиге бөлүүсүн каалабайм. Жогорку Кеңеш бул демилге боюнча туура чечим кабыл алат деп ишенем", - деди Икрамов.

Айта кетсек, 7-июнда парламенттин тийиштүү комитетинде жума күнкү тыныгууну 1 саат эмес, 2 саат кылуу нормасы каралган мыйзамдын долбоору талкууланып, ага 3 депутат "макул", 6 депутат "каршы" деп добуш берген. Демилгечилер жума намазына барууга мамлекеттик кызматта иштегендерге шарт түзүп берүү керектигин айтышууда. Жыйынтыгында көпчүлүк добуш менен долбоор четке кагылган. Чубак ажы Жалилов долбоорго каршы чыккан депутаттарга кол берип учурашпай турганын, шайлоолордо аларга добуш бербөөгө жарандарды чакырарын айткан.