1916-жылдагы Үркүндө курман болгондордун элесине арналган мемориалдык эстелик ачылды (фоторепортаж)

Бүгүн, 2-сентябрда "Ата-Бейит" мемориалдык комплексинде 1916-жылдагы Үркүндө курман болгондордун элесине арналган мемориалдык эстелик ачылды. Иш-чарага мамлекеттик, коомдук ишмерлер, чыгармачыл инсандар катышышты.

Эстелик 2015-жылдын 18-ноябрындагы сынактын жыйынтыгында жеңүүчү аталган айкелчилер Сардарбек Ажиев, Марат Огобаев жана архитектор Улан Бейшенбаевдин долбоорунун негизинде курулган. Аны курууга жалпысынан 5 ай убакыт кетип, 100дөй куруучу эмгектенген.

Эстелик-мемориал бир нече элементтен турат.

Борбордук композициясында кызыл гранит менен капталып, ууктарды элестеткен үч чулу массивде 21 метр бийиктикте түндүк орнотулган. Түндүк Кыргыз Республикасынын көз карандысыздык идеясын чагылдырып турат. Ал эми үзөңгүлөр ылдыйдан өйдө түндүккө карай кеткен. Көчмөн кыргыз элинде ээр токумсуз, бош үзөңгү - жоготуунун, трагедиянын символу. Бул кыргыз элинин ошол 1916-жылдагы абалын таамай чагылдырат. Курман болгондор элинин эркиндиги, көз карандысыздыгы үчүн өмүрүн сайгандар. Бул идея 1991-жылы Кыргыз Республикасы болуп түзүлгөндөн кийин ишке ашты. Боз үйдүн түндүгүнө карай кеткен үзөңгүлөр көз карандысыздыкка карай кеткен жолдун элесин берген.

Ошондой эле мемориалда "1916" деген дата түшүрүлүп, бир тарабында таасирдүү ыр саптары жазылган:

"Дүйнөгө ак калпакчан көрүндүк биз,

Асмандан жамгыр болуп төгүлдүк биз.

Чөп болдук жер тандабай өсө берген,

Булуттай аалам кездик, чачылдык биз.

Кырылып бара жатып тирилдик биз,

Бөлүнүп бара жатып бириктик биз".