"Жыргаганымдан минтип жүргөн жокмун. 10 сом берчи..." Үй-жайсыздар баш калкалоочу жайдан фоторепортаж

Учурда Бишкек шаарында үй-жайсыз калгандар үчүн баш калкалоочу муниципалдык мекемелер иштөөдө. Бишкек шаардык мэриясынын басма сөз кызматынан билдиргендей, кыш мезгилинен тартып бүгүнкү күнгө чейин көчөдө калган 100дөн ашуун адам аталган жайларга кайрылышкан. Бүгүн, 26-январда SUPER.KG порталы Бишкек шаарындагы айрым баш калкалоочу жайлардын жашоо-шарты менен таанышып кайтты.

Алгач Свердлов райондук өнүктүрүү башкармалыгындагы баш калкалоочу жайга баш бактык.

Свердлов райондук өнүктүрүү башкармалыгынын башкы адиси Аскарбек Мамаев: "Жыл сайын ноябрь айынан тартып үй-жайсыз калган адамдарга ушундай баш калкалоочу жайлар ачылат. Бирок күн суук болгон сайын киши көбөйүүдө. Бул жайдагыларга кечкисин бир маал ысык тамак берилет. Көмүр, отун түшүрүлгөн. Алардын коопсуздугу боюнча аймактык тескөөчүлөр менен медицина кызматкерлери иш алып барышат", - деди Мамаев.

Аталган жайдын ичине киргенде эле жагымсыз жыт каӊырыкты жарып кетти. Бири тереӊ уйкуда жатса, экинчиси жаӊы эле "Тез жардам" кызматынын унаасы менен алынып келген. Мас абалында кыйкырып, сөгүнүп жаткан 36 жаштагы үй-жайсыз калган жаран: "Мени бул жакка көчөдөн "Тез жардам" алып келди. Эжеге рахмат. Жыргаганымдан минтип жүргөн жокмун. Үй-бүлөм жок. 10 сом берчи..."

Ал эми көчөдө калган адамдарга кийим-кечектерди алып келгендердин бири Асел Касенова: "Биз жыл сайын кайрымдуулук акцияларын өткөрүп турабыз. Бүгүн аларга жылуу кийимдерди алып келдик. Мындан ары көчөлөр боюнча рейд жүргүзүп, селсаяктарга ысык чай беребиз", - деди.

Бул жайдан чыгып, Октябрь райондук социалдык өнүктүрүү башкармалыгына караштуу баш калкалоочу жайга да баш бактык.

Сталбек Эсенгулов, аталган башкармалыктын адиси: "Учурда биздин бул жакта 50дөй киши жашап жатат. Алардын көпчүлүгү улуу муундагылар, арасында жаштар да бар. Негизи алар кечкисин түнөө үчүн келишип, эртеӊ менен кетип калышат. Мажбурлап кармай албайбыз да. Биттеп келгендерди жуунтуп, кийимдерин алмаштырабыз. Мындан тышкары жууркан-төшөк, дары каражаттары жана 3 маал ысык тамак берилет. Тамак-аш, кийим-кечектерин көтөрүп демөөрчүлөр да келип турушат", - дейт.

"Тез жардам" кызматынан билдиргендей, учурда атайын 37 топ иштейт. Бирок алар жетишпегендиктен 10дон ашуун чакыруу кезек күтүп калышат. Күнүнө 600гө чейин чакыруу түшсө, анын 450сүнө барып жардам көрсөтүшөт. Калгандарына телефондон консультация берилет.

Болотбек Абдылдаев, "Тез жардам" кызматынын директорунун орун барасы: "Учурда селсаяктардын көйгөйү чекеге чыккан чыйкан болду. Өзүн карабаган адамдын өзү оорулуу да. 25-январь күнү эле 14 үй-жайсыз адамга жардам сурап чакыруу түшкөн. Алардын тогузу баш калкалоочу жайга, үчөө Бишкектеги Улуттук хирургиялык борборго, бирөөсү психикалык ооруканасына жеткирилип, бирөөсү эч жакка барбай ордунда калган".

Эскерте кетсек, Бишкекте январь айынын башынан бери үй-жайсыз 15 адам суукка тоңуп каза болгон.

Учурда Биринчи Май райондук администрациясына караштуу “Коломто” муниципалдык мекемеси, Ленин райондук администрациясында "Кайрымдуулук борбору" коомдук фонду, Октябрь райондук администрациясында 50 кишиге ылайыкташкан баш калкалоочу жай жана Свердлов районунда да ушундай жайлар ачылган. Аталган мекемелер менен байланышуу үчүн:

Биринчи Май райондук администрациясына караштуу “Коломто” муниципалдык мекемеси: Жибек Жолу-Тыныстанов көчөлөрүнүн кесилишинде. Сурап-билүү телефону: 0 (312) 304-855.

Октябрь райондук социалдык өнүктүрүү башкармалыгы: 12-кичи району, Аалы Токомбаев көчөсү ("Тазалыктын" имараты) Сурап-билүү телефону: 0 (312) 426-447.

Свердлов райондук өнүктүрүү башкармалыгы: Фере 34-а, 0 (312) 580-368, 0 (556) 56-46-56;

Ленин райондук администрациясынын "Кайрымдуулук борбору" коомдук фонду: Сурап-билүү телефону: 0 (312) 644-871.