"Ош базардагы" өрт: "Салыкта унутулбайбыз, өрттөн кийин абалыбызды сураган бир да эл өкүлү болгон жок" дешет соодагерлер

Жабыр тарткандардын дээрлик баары соода кылган жерди ижарага алып, товарды болсо насыяга, үстөк пайызы менен акчага алып оокат кылып жатышканын билдиришти. Көпчүлүк соодагерлер үй-бүлөсүн дал ушул соода-сатыктан тапкан акчасы менен багарын, эми эмне кылып каражат табарын билбей тургандыгын айтышты.

"Ош базарында" соода кылып үй-бүлөмдү бакканыма 10 жылдын жүзү болду. Мындай окуя болуп кетет деп эч ким күткөн эмес. Бул жакта тургандардын баарынын моюнунда эки-үчтөн насыялары бар. Ал насыяларды өз убагында төлөбөсөк, күрөөгө койгон үйлөрүбүздү банктар алып коёт. Анда канчалаган үй-бүлөлөр талаада калат. Өрт кечээ болсо, базардын жетекчилиги биз менен бүгүн гана жолугушуп отурат", - деп билдирди өрттөн жабыр тарткан Канимет Додонова.

Ошондой эле Додонова базардын жетекчилиги тарабынан тиешелүү көңүл бурулбай жаткандыгын билдирип, өрттүн келип чыгыш себептери тууралуу эч кандай маалымат берилбей жаткандыгын кошумчалады.

Өрт чыккан 2 кабаттуу "Сейтек" кичи базарында кийим-кечектер сатылчу, буга байланыштуу чыккан өрт аз убакыттын ичинде күчөп өрт өчүрүүчүлөрдүн ыкчам иш-аракеттерине карабастан, товарларды сактап калганга мүмкүн болгон эмес. Өрт көзөмөлдөө башкармалыгынын башчысы Таалайбек Өмүрзаковдун билдиргенине таянсак, өрт өчүрүү кызматынын негизги максаты - ошол маалда өрттү чектеп башка жерлерге жайылып кетпөөсүн көзөмөлдөө болгон.

Өрттөн жабыр тарткан соодагерлер менен жолугууга келген "Сейтек" кичи базарынын жетекчисинин орун басары Сабырбек Сакинбаевдин айтуусунда, өрт эмнеден келип чыккандыгын аныктоо үчүн Мамлекеттик экологиялык-техникалык инспекция 10 күн керек экендигин билдирген.

"Бүгүн өрттөн жабыр тарткандардан атайын топ түзүп Жогорку Кеңешке барып эл өкүлдөрүнө кайрылалы деп жатабыз. Экспертизанын жыйынтыгы чыгып, эгерде базарды калыбына келтирүү мүмкүн десе анда оңдоп-түзөө иштерин баштап кайрадан соода орундарын түзүп берсек деген аракеттерди көрүүдөбүз", - деди Сакинбаев.

Базар башчысы кичи базарда өрт коопсуздугунун бардык эрежелери сакталганын жана ал жакта мыйзамга жараша текшерүү иштери жүрүп тургандыгын айтып өттү.

Жабыр тарткандар бир дагы бийлик өкүлү келип окуя болгон жер менен таанышып, аларга жолукпаганына нааразы экендигин да билдиришти. Алардын арасында соода кылган орундарын чоң суммадагы акчага сатып алып, мындан сырткары ар бир метрине 50 сомдон салык төлөгөндөр да бар. Бирок орунду сатып алгандыгы тууралуу алардын тийиштүү документтери жок. Соодагерлер салыкты төлөй турган учурда унутта калбаганын, бирок окуя орун алгандан кийин абалга кызыккан бир да эл өкүлүнүн болбогонуна нааразы болушту.

Ал эми адамдарга жумушчу орун түзүп берип жаткан ишкер Анарбек Мырзакуловдун айтымында, окуя болгон жерди оңдоп-түзөөгө кеминде 3 айдан ашык убакыт кетет. Эгерде адистер өрт чыккан жайды жараксыз деп табышса, анда соодагерлерге тарткан чыгымдарды өкмөт төлөп берсе алар кайрадан башка бир айласын таап, өз иштерин уланта тургандыгын белгиледи.

"Мен бул жерде 8 жылдан бери эмгектенем. Жер төлөнү өзүм ижарага алып 103 миң доллар коротуп оңдоп-түздөп 18 адамга соода кылуучу орун жасап, кайрадан сатуучуларга ижарага берген элем. Эми минтип базар күйүп кетти дегенде Оштон учуп келдим", - дейт ишкер Мырзакулов.

Соодагерлердин айтымында, алар өрт коопсуздугун сактоо боюнча текшерүүлөрдүн деле келгенин көрүшкөн эмес. Алар акыркы күндөрү абанын температурасынын кескин төмөндөшүнөн улам ар кандай жылытуучу каражаттарды колдонушкан. Учурда өрттөн улам келтирилген чыгымдарды аныктоо үчүн соодагерлердин ар бири күйүп кеткен товарынын суммасын чыгарууда.

Алдын ала айтылган маалыматтар боюнча, базардагы өрт электр тогунун чукул туташуусунан улам келип чыккан.