Көк-бөрү, Нооруз-2018: "Ынтымак", "Биримдик Аю", "Достук" жана "Арашан" командалары жарым финалга өттү (оюндардын жыйынтыгы)

Бүгүн, 17-мартта Бишкек шаарындагы "Аккула" ат майданында Нооруз майрамына карата көк бөрү боюнча республикалык мелдештин чейрек финалдык беттештери орун алып, жарым финалга өткөн командалар аныкталды.

Аталган мелдеште жалпы эсепте 16 команда катышкан, мелдеш олимпиадалык систем менен өтүп, чейрек финалда 8 команда күч сынады.

Биринчи орун алган беттеште Таластын "Ынтымак" командасы Ысык-Көлдүн "Толкун" командасы менен кез келди. Беттештин жыйынтыгында 8:1 эсеби менен былтыркы мелдештин жеңүүчүсү "Ынтымак" командасы утуп алды.

Кийинки беттеште Чүйдүн "Биримдик Аю" командасы менен Таластын "Мурас" командасы күч сынашты. Бул командалардын ортосундагы беттеш 7:3 эсебинде "Биримдик Аюнун" жеңиши менен аяктады.

3-оюнда Оштун "Достук" командасы менен Чүйдүн "Көк-Жал" командасынын кызуу беттеши орун алды. "Достук" бул беттеште атаандаштарына утууга дээрлик мүмкүнчүлүк берген жок. Оюндун аягында ири 14:2 эсеби катталып, Оштон келген команда жеңишке жетти.

Күндүн акыркы беттешинде "Сары-Өзөн" менен "Арашан" командалары кез келди. Беттештин жүрүшүндө эки командалар тең бирдей оюн көрсөтүп, оюндун акыркы мүнөттөрүнө чейин 0:0 эсеби катталып турду. Беттештин аягына 1 мүнөт калганда "Арашан" командасынын оюнчулары мыкты чабуул жасап, 1:0 эсеби менен жеңишке жетти.

Муну менен Таластын "Ынтымак", Чүйдүн "Биримдик Аю", Оштун "Достук" жана Чүйдүн "Арашан" командалары жарым финалга өтүштү.

Эми 19-мартта боло турган жарым финалдык оюндарда "Ынтымак" - "Биримдик Аю" жана "Достук" - "Арашан" командаларынын беттешин көрүүгө болот.

Бүгүн, 17-мартта болгон беттештердин жыйынтыгы, чейрек финал:

"Ынтымак" - "Толкун" - 8:1;

"Биримдик Аю" - "Мурас" - 7:3;

"Достук" - "Көк-Жал" - 14:2;

"Сары-Өзөн" - "Арашан" - 0:1.