"Ала-Тоо" аянтында Нооруз майрамына арналган салтанаттуу иш-чара өтүп жатат

Бүгүн, 21-мартта Бишкек шаарынын борбордук "Ала-Тоо" аянтында Нооруз майрамына арналган салтанаттуу иш-чара башталды.

Аталган иш-чарага борбор калаанын тургундары жана коноктору, шаардык мэриянын өкүлдөрү, башка өлкөлөрдүн Кыргыз мамлекетиндеги элчиликтеринин өкүлдөрү келип катышууда.

Майрамдык салтанат театрлаштырылган оюн-зоок программасы менен ачылды. Алгач аянтка дыйкандар чыгып эгин эгип жаз келгенин жар салышса, Умай эне арча түтөтүп жакшы каалоо-тилектерин айтып аластап өттү. Андан соң келген конокторго сүмөлөк таратылып, ак калпакчан аксакалдар жалпы журтка бата берип, жакшы тилектерин айтышты.

Андан соң концерттик бөлүк "Көчмөндөр оюну" деген ыр менен башталды. Андан соң куттуктоо сөзү шаар мэри Албек Ибраимовго берилди. Өз сөзүндө калаа башчысы Бишкек быйыл 140 жылдыгын белгилөөгө кызуу даярданып жатканын айтты. Ошондой эле ал шаар тургундарына бакыт, жаштарга кең келечек, ал эми шаарга өнүгүп өсүүнү каалап кетти.