Өзбек чек арачылары Кыргыз жаранын атып өлтүргөн окуянын чоо-жайы (кырсык болгон жерден фото)

7-апрель күнү Өзбекстандын чек арачыларынын огунан Аксы районунун 34 жаштагы Фархад Мырзакалыков аттуу тургуну каза болгон. Акыйкатчы институтунун Жалал-Абад облусундагы өкүлчүлүгүн кызматкерлери эртеси окуя болгон жерге барып келишип, акыйкатчы Кубат Оторбаевдин тапшырмасы менен иликтөө иштерин башташкан. Бул тууралуу SUPER.KG'ге аталган мекеменин маалымат кызматынын өкүлү Элмира Мадиева билдирди.

Институттун маалыматына караганда, район тургуну апасынын Өзбекстанда жашаган сиңдисинин үйүнө барган. Кайра Кыргыз мамлекетине кайтып келатканда өзбекстандык чек арачылар анын башына атып жиберишкен.

"Чек ара кызматынын Жалал-Абад облусундагы башкармалыгынын башчысы Таалай Кожошевдин маалыматы боюнча, 7-апрель күнү саат 7:30да Кербен шаарынын тургуну Фархад Мырзакалыков Өзбекстанда жашаган таежеси Дилорам Бекиеванын үйүнө арыктан аттап өтүп барып (бул арык шарттуу түрдө Кыргыз-Өзбек чек арасы катары саналат), саат 8:10до үйүнө кайткан. Ошол учурда Өзбекстандын чек арачылары жашынып турган жеринен чыгышып артынан кууп келишкен. Алардын бири Кыргыз мамлекетинин аймагына өтүп, Мырзакалыковду өздөрүнүн аймагына сүйрөп, ал макул болбой койгондо ок чыгарып жиберген. Атылган ок анын баш сөөгүнө (мурдуна) тийип, ошол жерден каза болгон.

Өзбекстандын чек ара кызматкери Фархадды өз аймагына сүйрөп баратканда эжеси көрүп калып, жардам сурап кыйкырган. Ага Кыргыз мамлекетинин эки жараны жардамга келишкенде чек арачылар аларды да “кыймылдасаңар атам!” деп коркуткан. Көп өтпөй эки тараптан эл чогулуп калганда гана Фархадды алып кетүүгө мүмкүнчүлүк болгон", - деп билдиришти институттан.

Окуядан соң Таалай Кожошев Өзбекстандын чек ара өкүлү Шавкат Мирзоабдуллаев менен сүйлөшкөн. Анда ал 2010-жылы 6-январда эки өлкөнүн чек ара кызматтарынын жетекчилери “Куралды өзгөчө учурларда гана колдонуу” боюнча макулдашканын, бирок Өзбекстан тарап ал макулдашууну бузуп жатканын эскерткен.

Учурда окуя боюнча өкмөттөр аралык комиссия иштеп жатканы, болгон окуя боюнча Аксы РИИБи тарабынан кылмыш иши козголгону белгилүү болду.