Футбол боюнча Кыргыз курама командасы дүйнөлүк рейтингде 40 тепкичке көтөрүлүп, айдын эң мыкты командасы аталды

Футбол боюнча Кыргыз курама командасы ФИФАнын жаңыланган рейтингинде Кыргыз тарыхындагы эң жогорку көрсөткүчкө жетип, 75-орунду ээледи.

Март айында Кыргыз курама командасы 2 беттеш өткөрүп, жеңишке жетти. 22-мартта Түштүк Кореянын Инчон шаарында Мьянма менен беттешип, 5:1 эсебинде жеңип алса, 27-мартта Бишкек шаарында Индия менен беттешип, 2:1 эсебинде жеңип алган. Бул жеңиштердин жыйынтыгында, Кыргыз курама командасы 424 упай топтоп, ФИФАнын рейтингинде 75-орунга көтөрүлдү.

Мындай көрсөткүч менен Кыргыз курамасы 40 тепкичке өйдө көтөрүлүп, айдын эң мыкты командасы аталды. Ал эми Азия өлкөлөрүнүн арасында Кыргыз курамасы 7-орунду ээлеп, Бириккен Араб Эмираттары, Сирия жана Ливан курама командаларынан ашып өттү.

Айта кетсек, ФИФАнын март айында жарыяланган рейтингинде Кыргыз курама командасы 115-орунга ээ болгон.