Москвада Кыргыз жараны катышкан жол кырсыгы: Ооруканада дарыланып жаткан үч адамдын ден соолугу канааттандырарлык

Орусиянын Москва шаарында болгон жол кырсыгынан жаракат алган 3 жарандын абалы канааттандырарлык. Жакында бейтаптар ооруканадан чыгарылат. Бул тууралуу жергиликтүү басылмалар жазып чыгышты.

Маалыматка ылайык, 16-июнда 8 адам бейтапканага түшүп, текшерүүлөрдөн өтүп, биринчи жардамды алгандан кийин 5 адам ооруканадан кеткен.

"Үч адам учурда ооруканада жатат. Жакынкы убакта алар ооруканадан чыгарылат. Учурда дарыланып жаткандардын арасында чет элдик жарандар жок", - деп саламаттыкты сактоо бөлүмүнүн башчысы Алексей Хрипун билдирген.

Эске салсак, 16-июнда Москванын борбордук көчөлөрүнүн биринде такси кызматкери унаанын рулун башкара албай жөө жүргүнчүлөрдү сүзүп кеткен. Мындан улам 8 киши жаракат алган. Ал эми айдоочу күнү-түнү иштеп уктабагандыктан унаа айдап бара жатып уктап кеткенин милиция кызматкерлерине сурак берип жатканда айткан.