Президент Садыр Жапаров Сокулук районунун тургундары менен жолукту

Президент Садыр Жапаров бүгүн, 6-ноябрда, Чүй облусуна болгон иш сапарынын алкагында Сокулук районунун тургундары менен жолугушту.

Ачык диалог учурунда жергиликтүү тургундар ар кандай маселелер боюнча кайрылып, мамлекеттик деңгээлде чечүүнү талап кылган көйгөйлөрдү көтөрүштү.

Алар социалдык инфраструктураны өнүктүрүү, мектептерди жана спорт объектилерин куруу жана оңдоо, мамлекеттик ипотекалык программа аркылуу турак жай алуу, жер жана мүлк талаштары боюнча маселелерди белгилешти.

Ошондой эле мунапыс, кылмыш иштерин кароо жана укук коргоо органдарынын ишмердүүлүгүнө байланыштуу кайрылуулар айтылды.

Президент Садыр Жапаров ар бир кайрылууну кылдат жана ар тараптуу кароону тапшырды. Мындан улам тиешелүү министрликтерге жана ведомстволорго тапшырмалар берилди.