Айдоочу унаа токтотуучу жайдын улгайган кызматкерин эмнеге урганын айтып берди

Бишкектеги унаа токтотуучу жайдын улгайган кызматкерин ур-тепкиге алган айдоочу бүгүн, 26-сентябрда шаардык милиция тарабынан суракка алынып, окуянын чоо-жайын айтып берди. Анын айтымында, окуяга унаа токтотуучу жайдын кызматкеринин калп айтканы себеп болгон.

"Кызым ооруп калып, маанайым жок ооруканадан келе жаткам. Унаамды унаа токтотуучу жайдан чыгарып бара жатсам ал кызматкер алдымдан чыгып “сен токтоп тур, мен башка унааны чыгырып жиберейин” деди. Мен шашып жатканымды түшүндүрүп, унаамды айдай бердим. Ал унаамдын каптал тарабына өтүп, аны бир тепти. Мен "байке, бул эмне кылганың?" десем, "карабайсыңбы, бутумду тебелеп кеттиң!" деп калп айтты. Мен жанына жеткиче да көп нерселерди айтты, сөгүндү. Аны сүзгөн эмесмин, ал капот жакка туруп алды. Мен ачууланып кеттим. Калп айтып, мени сөкпөсө, мен андайга барбайт болчумун. Улуу киши болсо, улуудай болбойбу, унаамды тепкени туура эмес. Эгерде ал сөгүнбөсө, калп айтпаса “жасатып бересиң” деп коймокмун. Чындыгында улуу кишиге кол көтөрдүм деп өкүнөм, бирок ал өзү ошого жеткирди. Сөгүнбөсө, жакшы сүйлөсө, мындай болмок эмес", - дейт айдоочу.

Анын бул аракетине карата Кылмыш-жаза кодексинин 234-беренеси (бейбаштык) менен кылмыш иши козголуп, убактылуу кармоочу жайга камалды.

Эске салсак, кечээ, 25-сентябрда интернетке "Мега Комфорт" соода борборунун жанындагы унаа токтотуучу жайда айдоочу улгайган жумушчуну сүзүп алган. Интернет колдонуучулар улгайган кишини ур-токмокко алган айдоочуну жоопко тартууну талап кылышкан.