Сооронбай Жээнбеков оппозициялык телеканалдын кабарчысын келекеледи

"Иним Асылбек Жээнбеков мени сөз болбосун деп коркконунан үйдө отурат" деп бүгүн, 19-декабрда маалымат жыйынында президент Сооронбай Жээнбеков айтты.

Оппозициялык "Апрель" телеканалынын кабарчысы Канат Каниметов Райымбек Матраимовдун байлыгы, ага карата президенттин реакциясы жоктугу, жоопкерчиликке тартылабы деген суроо берди. Ошондой эле бир тууганы Асылбек Жээнбековдун Кыргыз өлкөсүнүн кадрдык маселелерин көмүскөдө чечкен адамга айланып калгандыгы тууралуу кептердин анык-бышыгын сурады.

"Канат, кандай? Эптеп ойлонуп таапсың да ээ кечээтен бери ошол экөөнү?" - деп күлүп жообун баштады президент.

"Эгер Асылбек Шариповичтин мамлекеттик ишке аралашкан фактылары болсо, кеңселери болсо, даректерин бергиле. Канча журналист бар, барып тарткыла. Кеңсеси болсо, мамлекеттик ишке киришсе, чара көрөйүн деп жатам. Эч кимди аябайм", - деди өлкө башчы.

Андан соң ал Бажы кызматынын төрагасынын мурдагы орун басары Райымбек Матраимов тууралуу суроого төмөнкүдөй жооп берди.

"Матраимов мен келгенге чейин 8 жыл Бажы кызматында иштеген. Эгер пара алган факты болсо, текшерем, чара көрөм. Үйлөрү салынса, менин убагымда салынган жок да. Буюрса, факт болсо текшертем", - деп убадалады Жээнбеков.