Беш баласын жалгыз баккан энеге жер тилкеси берилип, ишкер үй салып берүүгө киришти

Таштанды терип 5 баласын жалгыз баккан Нургүл Бекиевага "Алыш" федерациясынын вице-президенти, жеке ишкер Советбек Рустамбек уулу жер маселеси чечилсе үй салып бере турганын убадалаган болчу.

"Көмөктөш Бол" коомдук кайрымдуулук уюму Сокулук районунун Токбай айылынан 5 сотых жер тилкесин берип, аталган уюмдун төрагасы Юсуп Сайпиев 3-мартта Нургүл Бекиеваны Токбай айылына алып барып жердин кызыл китебин колуна тапшырды.

Уюмдун төрагасы: "Биздин уюмдун жардамга муктаж адамдарга беребиз деген 15 сотых жери бар болчу. Нургүл Бекиеванын тагдырын көрүп өз салымыбызды кошолу деп ошол жерден 5 сотых жер бөлүп берип отурабыз", - деп сөз сүйлөдү.

Мындан улам Советбек Рустамбек уулу берген убадасына туруп үй салууга киришти. Анын айтымында, үйдүн курулушу ушул жума ичинде башталып, 1-июнга чейин бүткөрүлөт.

"Жараткан Нургүл Бекиевага жардам берүүнү мага буюруп койгонуна сүйүнүп жатам. Карындашыбыздын тагдырын алгач видеодон көргөндө балдары чоңойгонго чейин жардам берип турайын деген ой болгон. Бирок үйүнө барып абалын көргөн соң үй салып берейин деп максат койдум.

Мына, "Көмөктөш Бол" коомдук уюму 5 сотых жер бөлүп берип, үйдү салууга киришип жатабыз. Буюрса, үйдү үч айдын ичинде бүтүрүп, 1-июнь - Балдар күнүндө Нургүл Бекиеваны балдары менен жаңы үйгө киргизебиз", - деди Рустамбек уулу.

Учурда Нургүл Бекиевага жардам берүү уланууда. Өзүнүн айтымында, айрымдары турмуш-тиричилигине керектүү буюмдардан тартып азык-түлүгүнө чейин алып келип берип жатса, көпчүлүгү акчалай жардам көрсөтүүдө.

"Менин тагдырымды чалгылдырган SUPER.TV'га, жер тилкесин берип, үй салып берип жаткан агаларыма жана жалпы элге терең ыраазычылык билдирем. Учурда 165 миң сомдон ашык акча чогулду. Анын 50 миң сомго жакынын чет өлкөдө иштеп жүргөн мекендештерибиз берген болсо, калганы Кыргыз жериндеги агаларыбыз, эжелерибиз тарабынан чогултулду. Эми таштанды терип иштебейм, балдарымды жакшы карайм", - деп ыраазычылыгын айтты ал.