Бир керебетте 4-5тен бала, батпай калгандары жерде жаткан бала бакчанын директору эмнеге андай болгонун түшүндүрдү

Социалдык тармактарга бир керебетте 4-5тен, калганы полдо уктап жаткан балдардын видеосу тарап, кечээтен бери кызуу талкууга алынууда. Бул бала бакча Бишкектеги №1 "Шоола" балдар бакчасы экенин уккан ата-энелер бүгүн бала бакчанын жанына чогулушуп арыз-муңдарын билдиришти. Бул боюнча комментарий берүүнү каалабаган директор акыры дарбазадан чыгып, окуянын чоо-жайын түшүндүрүүгө аракет кылды.

Бала бакчанын директору Айнагүл Мадылбаева алгач башкармалыктан уруксат бермейинче жооп бербейм деп, кийин эмне себептен улам балдар андай шартта уктап жатканын SUPER.KG порталына айтып берди.

"Учурда бул видео боюнча текшерүү иштери жүрүүдө, анын жыйынтыгы чыкмайынча эч кандай комментарий бере албайм. Мындай нерсе буга чейин болгон эмес. Орто тайпадагы балдардын уктоочу бөлмөсүндө сырдалган жерлери кургабай калган. Мындан улам балдар башка тайпадагы балдар менен бирге жаткырылган болчу. Бала бакча 320 балага ылайыкталган",- деди ал.

Бала бакчанын директору мындан башка суроолорго жооп бербей, дарбазасын бекитип кирип кетти. Ичине кирип тартуу иштерин жүргүзүүгө да макулдугун берген жок.

Бала бакчанын кызматкеринин маалыматына ылайык, учурда прокуратура жана башка мекемелер тарабынан текшерүү иштери жүрүүдө.

Окуянын чоо-жайына кайрылсак:

Кечээ интернетте бала бакчада 50гө жакын бала бир бөлмөдө, бир керебетке 4-5тен узун-туурасынан жатканы тартылган видео тараган. Кээ бири батпай калып, полдо уктап жаткандары да бар. Тасма Бишкектеги №1 "Шоола" балдар бакчасында тартылганы аныкталган.