Бишкекте сабалган 7 жашар баланын апасы: "Күйөөм баламды буга чейин да сабап келген"

12-май күнү 7 жаштагы Н.У. аттуу бала өз атасы тарабынан сабалып, денесине залал келтирилип Бишкек шаарынын №3 балдар ооруканасына жеткирилген.

Баланын апасы 39 жаштагы Н.Г. баласын жолдошу сабаганын айтып, окуянын чоо-жайын SUPER.KG'ге айтып берди.

Анын айтымында, жолдошу өзүнөн 6 жаш кичүү, экинчи турмушу. Биринчи жолдошунан 3 баласы, ал эми экинчи турмушунан сабалган жалгыз уулу бар. Жолдошу менен жашаган 8 жылдын аралыгында күйөөсү баласына эле эмес, өзүнө да кол көтөрүп келген.

Окуя болгон күнү Н.Гга жолдошу телефон чалып баласы дайынсыз жок болуп жаткандыгын айткан. Апасы жумушунан келип экөө баласын издешкен. Жыйынтыгында бала кошунасыныкында жашынып калганын билишип, атасы уулун сабап салган. Ошондой эле ал күйөөсү азыр качып жүргөнүн, анын камалышын каалаарын, милицияга арыз менен кайрылганын айтты.

Бул факт боюнча Бишкек ШИИБинин басма сөз кызматынын инспектору Сайкал Садыбакасова төмөнкүлөргө токтолду:

"Аталган факт Кылмыштардын жана жоруктардын бирдиктүү реестрине катталып, Жоруктар жөнүндө кодексинин "Үй-бүлөдөгү зомбулук" фактысы менен сотко чейинки өндүрүшкө алынган. Учурда жабырлануучу балага карата тийиштүү экспертизалар дайындалып, териштирүү иштери жүргүзүлүүдө".