Жалпы республикалык тестирлөөдө эң жогорку балл алган Элдияр Чормонов кантип ийгиликке жетишкендиги тууралуу айтып берди

Жалпы республикалык тестирлөөдө 238 балл алып, өлкө боюнча биринчи болгон Элдияр Чормонов SUPER.KG'ге маек курду. Ал өзүнөн кийинки муунга ийгилик сырлары менен бөлүштү.

- Элдияр, саламатсызбы? Ийгилигиңиз менен куттуктайбыз! Өлкө боюнча эң жогорку балл алуу деле оңой эмес болуш керек, канча убакыт даярдандыңыз?

- Сиздерге рахмат, куттуктооңуздар үчүн. Жалпы республикалык тестирлөө өтө деле татаал эмес. Ал жактагы суроолор мектепте өтүлгөн темалардын негизинде түзүлгөн. Ага даярдануу өтө көп убакытты албайт. Мен даярданууну 11-класстын башынан баштадым. Бирок чын көңүлүм менен Жаңы жылдан кийин даярдандым. Бош убактымдын көп бөлүгүн даярданууга бөлүп, лицей тарабынан уюштурулган ийримдерге катышып, эжей-агайлардын кеңештерин алып даярдандым. Эң негизгиси аракет кылыш керек.

- Өзүңүз тууралуу кененирээк айтып берсеңиз, кайсыл жердин кулунусуз?

- Мен 2001-жылы 6-октябрда Токтогул районуна караштуу Үч-Терек айылында төрөлгөм. Муктар Нургазиев атындагы орто мектепте окудум. Андан кийин атайын сынактын негизинде лицейге өтүп, 11-классты аяктадым. Үй-бүлөдө беш бир тууганбыз, үч байкем, мен анан карындашым бар.

- ЖРТга даярдануу учурунда эмнелерге басым жасоо керек?

- Суроолор көбүнчө логикалык ой-жүгүртүүнү талап кылат. Атайын китептерди алып даярданса болот.

- ЖРТга даярдануу үчүн бир жыл бою телефон колдонбогонуңузду айткан экенсиз...

- Ооба, мен аяктаган лицейде телефон алып келүүгө болбойт, тартип ушундай. Тартипке баш ийип бир жыл бою телефон колдонгон жокмун. Албетте, ошол дагы аябай чоң жардам берди.

- Кайсыл кесиптин ээси болсом деп жатасыз? Мекенибизде эле окуйсузбу?

- Бул суроонун үстүнөн да көп ойлондум. Ата-энем, жакын адамдарым менен кеңешип програмисттик кесипти тандайын деп жатам. Анткени келечек ошол кесипте. Негизи чет өлкөдө да окугум келет. "Алтын сертификат" менен бул жакта бекер окууга мүмкүнчүлүк бар. Ошондуктан Кыргыз өлкөсүндөгү окуу жайлардын бирине тапшырам.

- Өлкөгө пайда алып келүү үчүн эмне кылуубуз керек?

- Билим менен гана пайда алып келе алабыз. Баарыбыз билимдүү болсок өнүгөбүз.