Манас Ниязов: "Оюн кубалашып өттү, бирок ийгилик бизге жылмайды"

Бүгүн, 31-августта Чолпон-Ата шаарында өтүп жаткан көк бөрү боюнча Кыргыз өлкөсүнүн президентинин Кубогуна арналган мелдеште Жогорку Лиганын финалында "Ынтымак" менен "Достук" командалары күч сынашты.

Бүйүр кызыткан, көрүүчүлөрдү ордунан тургузуп бирде сүйүнтүп, бирде демин ичине катырган оюнда Оштун "Достук" командасы жеңишке жетишти.

Нааразычылык менен коштолгон оюнда Манас Ниязов тай казанга 2 улак таштаса, оюндун бүтүшүнө 1 мүнөт калганда Майрамбек Рысбеков "Ынтымактын" тай казанына улак ыргытып оюндун жүрүшүн чечти.

Белгилүү улакчы Манас Ниязов оюндан соң Кыргыз элин майрамы менен куттуктап төмөндөгүлөргө токтолду:

"Бүгүнкү оюн оор болду. 2-команда тең өзүнүн мыкты экенин көрсөтүштү. Бирок бул ирет ийгилик бизге жылмайып жеңишке жеттик. Кийинки оюнда Бойка менен чыгам. Бул жолу оюнга Бойка чыкмак, бирок, жарааты толук бүтсүн деп чыгарган жокпуз. Ага карабастан, Шторм да өзүнүн мыктылыгын көрсөтүп Бойканын ордун басты", - дейт Манас Ниязов.