Ошто 33 жаштагы келин 6 айлык наристесин күйөөсүн коркутуп коюу максатында мейманкананын жанына таштап кеткен

Ош шаарында мейманканалардын биринин алдына 6 айлык наристени апасы жолдошун коркутуп коюу максатында таштап кеткен. Бул тууралуу ОШ ШИИБинин басма сөз кызматынан билдиришти.

Маалыматка ылайык, окуя 15-октябрда болгон. Анда шаардагы мейманканалардын биринин кызматкери милицияга эшикте 4-5 айлык наристени таштап кетишкени боюнча кабар берген. Окуя катталган жерге ыкчам-тергөө тобу барып, наристенин аты-жөнүн тактап, ал ушул жылдын май айында төрөлгөнү аныкталган.

"Териштирүү иштеринде наристенин апасы Өзгөн районунун Куршаб айылынын 33 жаштагы тургуну болгон. Ал алгачкы көрсөтмөсүндө наристени жарандык никеде жашап жүргөн 25 жаштагы күйөөсү "менин балам эмес" деген сөзүнөн улам аны коркутуп коюу максатында бул ишти кылганын айткан. Ошондой эле ал баланы таштап коюп, өзү 40 метр аралыкта баласын карап турган. "Тез жардам" кызматы келгенде ал баланын жанына келип баланын апасы экенин айтып, ооруканага чейин өзү кошо барган. Учурда бул факты Кылмыштардын жана жоруктардын бирдиктүү реестрине "коркунучта калтыруу" беренеси менен катталып, тергөө иштери жүрүүдө", - деп билдирет басма сөз кызматынан.