ИИМ депутаттын "өлкөдө криминал баш көтөрдү" деген сөзүнө жооп кайтарды

Ички иштер министрлиги депутат Жанар Акаевдин "өлкөдө криминал баш көтөрдү" деген сөзүнө жооп кайтарды. Бул тууралуу аталган министрликтин басма сөз кызматынан билдиришти.

"Бир катар маалыматтык агенттиктер бүгүн ички иштер министрлигинин дарегине терс сын-пикирлерди айтып, криминал башын көтөрүп жаткандыгы, ал эми өкмөт алсыз экендигин көрсөтүп жаткандыгын жазып чыгышты. Анда Кыргыз мамлекетинде криминал баш көтөрүп, ишкерлер болсо өлкөдөн чыгып кетип жатышат деген маалымат жазылган. Ошондой эле криминал менен күрөшүүдө саясий эрктин жоктугу белгиленген", - деди ИИМ.

Ички иштер министрлиги маалымдайт, Кыргыз мамлекетинде криминал бат өскөнү боюнча билдирүүнүн өзүндө эч кандай негиздер жок жана чындыкка дал келбейт. Криминалдын башын көтөрүүгө мүмкүнчүлүгү жок, анткени ИИМ мыйзамдын үстөмдүгүн коргоп, адамдын укугу менен эркиндигин коргоп келүүдө.

"Бирок мурдагы жылдарда криминал өздөрүн ээн-эркин сезип, башын көтөргөн убактар болгону менен, азыркы убакта өлкөдө сөз эркиндиги бар, криминалдык курамдар менен аёосуз күрөш тынымсыз жүрүүдө.
"Мадина" кафесинин ээсинин өлүмү боюнча билдиребиз, аталган кылмыш ишин ачууга ИИМдин, Бишкек ШИИББинин Криминалдык милиция кызматынын тажрыйбалуу кызматкерлери тартылган. Кылмыш белгилерин дыкаттык менен жашырууга аракет кылгандары менен ички иштер органдарынын кызматкерлери кылмышкерлердин изине түшүп, өзгөчө оор кылмышты жасоого шектелгендердин баарын кармашты. Аталган коомдук кызуу талкуу жараткан кылмыш иштин ачылышы тарыхта кала берет. Тилекке каршы, "Мадина" кафесинин ээсинин өлүмүн алдын алууга үлгүрбөй калдык. Дайынсыз жоголгон ишкерди тактоо максатында көптөгөн иштер жүргүзүлдү. Ыкчам-тергөө иш-чараларынын жүрүшүндө мүлккө ээ болуу, опузалап талап кылуу, карактоо, адам өлтүрүү максатында адамды уурдоого шектелген бүтүндөй кылмыштуу топ кармалды", - деп жазылат маалыматта.

Ал эми "Осьминог" кафесинин өрттөлүшү боюнча болсо, ички иштер органдарынын кызматкерлери шектүүлөрдү кармап, алар кылмыш жоопкерчилигине тартылганын кабарлашты.

"Ички иштер органдарынын кызматкерлери кылмыштуулук менен күрөшүүдө ар дайым алдыда турат. Кээ бирөөлөрдүн Кыргыз мамлекетинде криминал башын көтөрүп жаткандыгы жөнүндө билдирүүлөрү негизсиз экендигин белгилейбиз. Ички иштер министрлиги ар дайым укуктук тартипти бекемдөө жана кылмыштуулук менен күрөшүү боюнча өз милдеттерин так аткарып келүүдө. Министрликтин эң маанилүү багыттарыны бири катары жарандардын жеке коопсуздугун, укугун, эркиндигин жана мыйзамдуу кызыкчылыгын камсыздоо эсептелинет", - деп билдирди ИИМ.