16 жаштагы кыз: "Жездем зордуктап жүргөнүн ачыктасам, балдары мени күнөөлөп жатышат"

Бизге башынан өткөргөн кайгылуу окуясын айтып, кайрылган өспүрүм кызды Айчолпон деп атадык. Ал 13 жашынан бери жездеси тарабынан зордукталып келгенин айтат.

“Жездемдин бул кылмышын ачыкка чыгара албай жүргөнүмө анын мени, атамды өлтүрүп коём деген коркутуулары себеп болгон” дейт Айчолпон.

Эми ал жездеси тарабынан зордукталып жүргөнүн ачыктады, бирок туугандары бул окуяга кыздын өзүн күнөөлөп жатышканын айтат. Ошондой эле ал “жездемди күч органдары эркиндикке коё берип жиберишти, ал келип мени коркутса, башка кыздарды зордуктаса кандай болот?” деп акыйкаттык издеп жүргөнүн кошумчалайт.

Жактоочу Шердор Абдыкапаров Айчолпондун кызыкчылыгын коргоп иш алып барууда. Жактоочунун айтымында, алар бул окуя боюнча Чүй облустук милициясына кайрылышкан, милиция кызматкерлери шектүүнү суракка алып, кийин ал үй камагына чыгарылган.

Видеону көрүү үчүн бул шилтемени басыңыз.