Бишкекте мэриянын такси кызматын уюштуруу сунушталды

Бишкекте муниципалитеттин такси кызматын уюштуруу сунушталды. Бул тууралуу Бишкек шаардык кеңешинин депутаты Казыбек Эргешов шаардык кеңештин кезектеги жыйынында айтты.

Анын айтымына караганда, муниципалитетте такси кызматы уюштурулса, шаардык бюджетке кирише түшмөк.

"Акыркы учурларда такси кызматына байланыштуу митингдер болуп келгенин билебиз. Муниципалитеттин такси кызматын уюштурсак шаардык бюджетке дагы пайда алып келмек", - деп билдирди Эргешов.

Ал эми Бишкек шаарына санариптештирүү жана транспорт боюнча вице-мэри Таалайбек Орозов бул сунушту колдоорун айтып, бирок аны ишке ашыруу үчүн алгач бир топ иштерди аткарууга туура келерин айтып өттү.

"Бул сунушту колдойм. Өнүккөн өлкөлөрдө мамлекетке тиешелүү кызматтар бюджетке көп киреше алып келген мисалдар бар. Эгер мүмкүнчүлүк болсо, менчик такси кызматтардын дагы кызыкчылыктарын коргоо менен ишке ашыруу зарыл", - деди Орозов.