Бир колу жок Айзаттын күйөөсү: "Мен Айзатка талак берем, үйдү мага өткөрсүн"

Буга чейин социалдык тармакта ден соолугунун мүмкүнчүлүгү чектелген Айзат Мамырбай кызы өзүнүн инстаграм баракчасына бейтааныш жигит менен түшкөн сүрөттөрү жүктөлгөндөн кийин сынга кабылган.

Интернет колдонуучулардын көбү Айзатка терс пикирлерин калтырып жаткан маалда Айзат Мамырбай кызы SUPER.KG порталына маек берген. Анда ал жолдошу Рустам Иманалиев менен пикир келишпестик жаралганын, азыркы тапта Ошто ата-энеси менен чогуу жашап жатканын жана сүрөттөгү бейтааныш мырза анын бөлөсү болорун маалымдаган.

Айзат Мамырбай кызынын пикирин уккандан кийин экинчи тараптын да оюн угууга даяр экендигибизди айтканбыз. Айзаттын жолдошу Рустам Иманалиевдин өтүнүчү менен анын пикирин уктук.

"Айзаттын SUPER.KG порталына берген маегин окуп күлкүм келди. Ал жерден Айзат апыртып жиберген экен. Кепти башынан айтсам, Айзат Ошко тойго кетип ал жерде 3 айга чукул убакыт жүрүп алды. Кайын-журтума чалып отуруп акыры келди. Кийин дагы 10 күнгө кетти. Бирок келгенден кийин мага болгон мамилеси өзгөрүп кетти. "Ары турчу, мен сени көргүм келбей жатат" деп кага баштады. Эмне десе макул болуп жүрдүм. "Мага көңүл бурбай калды, телефонун чукулап эле отурат" деген экен. Мен көңүл бурбасам кычырап кийинмек эмес. Телефон тууралуу айта турган болсом, биз IT боюнча курста окудук. Ал жерден бизге үйгө тапшырма беришет. Ноутбугум жакшы иштебегендиктен телефондон кароого туура келчү. Аялым кулак-мээмди жеп отуруп ал окуунун да аягына чыга албай калдым. Такси айдап иштейин десем "сени өлтүрүп кетишет, жаныңа башка кыздарды салып аласың" деп иштетпей койду.

Айзат уктап жаткан маалда анын телефонун көрүп калдым. Кызык болгондуктан TikTok'о кирип отургам. Бир маалда билдирүү келди. Окуп алып жаман болуп кеттим. Телефонун талкалап жибергим келди. Бирок өзүмдү кармап телефонума тартып алдым. Ошол учурда Айзат ойгонуп кетип телефонун жулуп алды. Андан кийин эмне кылышты билбей бир топко чейин кыйналдым. Бир маалда дүкөнгө барып коньяк алдым. Аны унаамда ичип отуруп уктап калган экенмин. Досум келип ойготкондон кийин үйгө барсам, Айзат түшкү саат 3кө чейин уктап жатыптыр.

Ошол учурда карындашым жана досум үйдө эле. Ал тамак жасап отуруптур. Биз тамак ичип отурган маалда кашыкты алып Айзат жаткан бөлмөнүн эшигине бир нече жолу ыргыттым. Ал бир аздан кийин туруп келип сүйлөндү. Мен дагы бир ирет үстөлдү ургандан кийин ал "жүрөгүмдү түшүрүп жатып боюмдан түшүрөсүң" деп кыйкырды. Мен кружканы алып үстөлдү койгулап жатканда Айзат дасторконду тартып жиберди да, сыртка качып чыгып кетти. Досум аны алып кирүүгө аракет кылды окшойт. Бир маалда агасы менен келди. Экөө кичинекей баланы алдап жаткансып "фейк аккаунт турбайбы" деп мени алдоого аракет кылышты. Андан кийин чыгып кетишкен. Ошол бойдон Айзат Ошко кеткен экен.

"Мага жардам бербейт, оор жумуштарды жасайм" деп айтыптыр. Үйдө андай деле жумуш жок. Суу ташыбайт. Болгону тамак жасайт. Айзат Ошко телефонун үйгө таштап кеткен экен. Ал мага "телефонума тийбеңиз" дей берди. Анткен сайын телефону мени кызыктырып, ачып карасам сыр сөзү бар экен. Телефонду толугу менен өчүрүп, кайра жандыргандан кийин эски сүрөттөрү чыкты. Ал жерден балдар менен түшкөн, аларга жөнөткөн жарым жылаңач сүрөттөрүн таап алдым. Үй-бүлөлүү эркектер менен кат жазышып жүргөндөрүнө чейин таптым. Айзатты "үйдү өткөрүп бер" деп шаарга чакырдым. Сүрөттөрүңдү жарыялайм деп дагы айтып көрдүм. Бирок уккан жок. Кайыненем телефон чалып, көп нерселерди айтып ызылдады.

Мен ажыраша турганымды айткан соң Айзат экөөбүзгө курулуш компаниялардын бири берген батир талашка түштү. Аны каттоо маалында менин паспортум жанымда жок болуп, Айзатка катталган. Ал үйдү экөөбүздүкү эмес, өзүнүкүндөй эле сезип алды. Негизи Айзат Оштон жер алмак. Батирди мага ташта десем болбой жатат. Менден 300 миң сом сурашты. Бирок менде андай акча жок. Акчам болсо эч кимге жалдырабай эле үй сатып алмакмын. Мен Айзат менен жашай албайм. Көпкө чейин ойлонуп ажырашуу тууралуу чечимди кабыл алдым", - деди ал.

Эскерте кетсек, SUPER.KG порталы 2020-жылы түгөйлөрдүн тагдырын чагылдырган соң бул видео калың элге тарап, курулуш компаниялардын бири жаштарга бир бөлмөлүү батир белек кылган.