Чүйдө куралды мыйзамсыз колдонууга шектүүлөр кармалышты (видео)

Чүй облусунда куралды мыйзамсыз жүгүртүүгө шектелген жарандар кармалышты. Бул тууралуу облустук милиция билдирди.

Маалым болгондой, Сасык-Булак айылынын түштүк тарабындагы тоолуу аймакта жайгашкан кошараларда ок атуучу куралдар жана башка тыюу салынган буюмдар мыйзамсыз сакталууда деген ыкчам маалымат түшкөн. Ттинтүү иштеринин натыйжасында 1994-жылы туулган С.Э. аттуу жарандан ТОЗ-8 үлгүсүндөгү 1 даана сайлуу ок атуучу курал, ага тиешелүү 70 даана ок, ошондой эле 3 даана сайсыз курал (ИЖ-16, ИЖ-28, ИЖ-32) жана аларга тиешелүү 42 даана ок табылды.

Ал эми 1986-жылы туулган Т.Р. аттуу жарандан сайлуу куралга тиешелүү 7 даана ок, "Мосин" системиндеги 1 даана сайлуу ок атуучу курал, 1 даана ИЖ-16 үлгүсүндөгү сайсыз курал жана ага тиешелүү 32 даана ок табылып алынган.

Ошондой эле 1977-жылы туулган М.Н. аттуу жарандан ИЖ-56 "Белка" үлгүсүндөгү 1 даана курал табылды.

Аталган жарандардын бардыгы ички иштер бөлүмүнө жеткирилип, тиешелүү тергөө амалдары жүргүзүлүп, соттук экспертизалар дайындалды. Тергөө уланууда.