АКШ менен Иран кийинки сүйлөшүүлөрдүн убактысын жана ордун аныктай элек

АКШ менен Иран Жакынкы Чыгыштагы кырдаалды жөнгө салуу боюнча экинчи айлампа сүйлөшүүлөрдүн датасын жана өтө турган жерин азырынча аныктай элек. Бул тууралуу Wall Street Journal басылмасы атын атагысы келбеген расмий булактарга таянып жазып чыкты.

Маалыматка ылайык, тараптар жолугушууну өткөрүүгө негизинен макул болушкан, бирок Исламабаддагы узак сүйлөшүүлөр жыйынтыксыз аяктагандан кийин конкреттүү убакыт жана жер боюнча чечим кабыл алына элек.

Басылманын булактары белгилегендей, аймактагы ортомчулар ок атышпоо режимин узартууга жана экинчи сүйлөшүүлөрдү уюштурууга аракет кылып жатышат, бирок жылыш жай жүрүүдө.

Эске салсак, 28-февралда АКШ жана Израил Иран аймагына сокку ура баштаган. 8-апрелде Вашингтон менен Тегеран эки жумага ок атышпоону жарыялашкан. Андан кийинки Исламабаддагы сүйлөшүүлөр натыйжа берген эмес. Азырынча согуш аракеттери кайра башталганы тууралуу маалымат жок, бирок АКШ Иран портторуна блокада киргизген. Ортомчулар жаңы сүйлөшүүлөрдү уюштурууга аракетин улантууда.