Камчы Көлбаевдин тобуна таандык... Чүйдө курал-жарак сакталган жашыруун жай табылды

Чүйдүн Москва районунда курал-жарактар, ок-дарылар жана атайын каражаттар сакталган жашыруун жай табылды. Бул тууралуу Улуттук коопсуздук мамлекеттик комитети билдирди.

Атайын кызмат курал-жарактар маркум кримтөбөл Камчы Көлбаев жетектеген топтун мүчөлөрүнө таандык экенин маалымдады. Жашыруун жай Беловодское айылындагы Крепостное көлмөсүнүн каршысында жайгашкан аймактан табылган.

"Келип чыгышы аныкталбаган 2 ок атуучу курал, 1 колго жасалган курал, 3 граната, ар түрдүү калибрдеги 177 гильза жана ок-дарылар, ар кандай куралдарга тиешелүү 9 магазин, Motorola үлгүсүндөгү 3 радиостанция, ошондой эле башка предметтер жана атайын каражаттар алынган",- деп айтылат маалыматта.

УКМК учурда аталган жашыруун жайга тиешеси бар адамдарды жана анын кандай максатта даярдалганын аныктоо иштери жүрүп жатканын кошумчалады.