Турак жай башкарууда санариптик өзгөрүүлөр сунушталды

Жогорку Кеңеш көп батирлүү үйлөрдү башкаруу тармагындагы ачык-айкындуулукту күчөтүүгө багытталган мыйзам долбоорун биринчи окууда жактырды.

Маалыматка ылайык, демилгечилер – депутаттар Дастан Бекешев жана Азамжан Жалилов.

Дастан Бекешевдин айтымында, мыйзам долбоору турак үйлөрдү башкаруунун натыйжалуулугун жогорулатууга жана санариптик чечимдерди киргизүүгө багытталган. Мындан тышкары турак жай ээлеринин шериктиктери (ТЭШ) кызмат адамдарынын жоопкерчилигин күчөтүү жана башкаруучу уюмдардын ишин жөнгө салуу каралууда.

Талкуу учурунда депутаттар бир катар сунуштарды беришти. Алардын ичинде ТЭШ мүчөлүк жана төлөм тартибин тактоо, эрежелер бузулса айып пул салуу, төрага ишин көзөмөлдөө жана отчёттуулукту күчөтүү маселелери бар.

Депутаттар Темирлан Айтиев, Бахридин Шабазов, Улукбек Карыбек уулу жана Жамиля Исаева да талкууга активдүү катышып, башкаруу системасын жакшыртуу боюнча сунуштарын билдиришти.

Жыйынтыгында мыйзам долбоору биринчи окууда колдоо таап, кийинки кароого жөнөтүлдү.